TERZIANO BERTOZZI (e generael)

Terziano Bertozzi , nato a San Vito nel 1935. Conosciuto a San Vito come "il buffone" e a Bellaria come "il generale", sopranome che lo accompagnerà tutta la vita.

Ha scritto numerose poesie dialettali, e si esibiva in "freestyle" a feste e matrimoni.

Ciclista appassionato partecipò a numerose competizioni.

In questa sua poesia si rivive il più puro spirito agonistico/ciclistico/romagnolo , simile a quello di molte Ciclo Imprese Estreme

Birgo, Pinaci, Gino ad Nicola, Giani di Ross
Curideur da foss

L'è zuzesta circa un ann fa
e avv garantess che l'è la verità.
Tot sta storia l'av farà roid
l'è una storia di curideur at San Void.
Us trata d'una manifestaziaun de pidael
a la quale l'ha partecipae enca e sot scrett, e Generael.
Tot i spurtoiv de post che i'è una quantità
i'avrebb diciois all'unanimità
di organizzare un circuito
con l'arrivo qui a San Vito.

M'i negozii i'è andè tot
per racoi un po' at baiocch,
i grusesta piò impurtent
i'ha dè un miera at french
mentre quei che i'è piò znin
i'ha dè una scatuleta, o un po' at mangim...
La farmicia, gnenca a fel aposta
la ha mes in palio un zirot e una suposta
per curè tot i zgagnul
che m'i curideur ui sareb anneu m'e cul.

Birgo chi dè e feva e curidaur
e per faes grand, per faes unaur
e s'è intromess t'la discussiaun
e l'ha det: - Burdell, un po' ad attenziaun,
me ma l'eutmi arivat
al savoi cus'el ch'ai dagh?
un servoizi at baerba, shampoo e cavell
s'u n'è vera, ch'u m'annes fura e murbell.
E intaent ch'e zcuroiva e ridoiva
parchè e pensaeva: l'eutmi a sarò me.

Giani di Ross l'eva scumess
una zoina a besa at pess:
con l'aiuto di Mussolini
batterò grandi e piccini,
il mio nome andrà alla storia.
Intaent i su averseri i zturzoiva e meus
e da nascost i s'alenaeva zò ma l'Eus.
Per fae e fiè Gino ad Nicola
e curoiva s'la cariola.
Pinaci, quel d'la faza tonda
e pansaeva: me che dè a togh la bomba.

Finalment e dè d'la gara l'è arivat,
a San Voit i paroiva tot mat:
chi curoiva a destra, chi a sinestra
che era ret s'la porta, chi ma la finestra,
i'aspitaeva la conclusiaun.
at sta gran manifestaziaun.
I premi i'era espost da la matoina
i'era tent che l'era pina una vidroina.
La prova che la gara l'era impurtaenta
l'era e nomri di curideur, circa zinquaenta.

Finalment i sbasa la bandira, i da e via.
Pinaci e fa: i va trop fort, Settimia mia!
E gropp l'era arvat za ma Casael
che Birgo u n'eva instecch incaura i pì in t'ì pidael.
An simi arivat gnenca dri caesa mì
che i quatri vecc i'era ztachid alà di drì.
Eun e gioiva: a sem tot mat.
Un'aent l'arspundoiva: cus'el ch'avem mai fat.
Eun e sudeva cumè un meul,
cl'aelt e biastmeva che ui bruseva e cheul.
Eun di quatri l'ha propost:
fema la cheursa per cont nost,
posta che la zenta in s'meta a roid
andem un po' fort drointa San Void,
e quant ch'a sem adlà d'là Gaiufaena
a ciapem e nost pas da murt at faena.

M'e cavalcavia d'l'autostraeda
i'eva fatt una sudeda
che Birgo e doi: toira te, Giani di Ross
an distengv piò la straeda da i foss.
Giani l'arspond: sa vut ch'a faza l'andatura
ch'a so' strach da fè pavura,
piotost quant che l'ha finoi la costa
av faz me una proposta;
alè t'la curva drì Sapegna
o guaers ben, u i'è una vegna,
as masem tra i pampanell
aspitem tot che burdell,
e sopti dop ch'l'è pass e gropp
a s'i sflemm di drì ma tott.

Birgo e scapa fura gend: me an m'arend
a i'ho una riputaziaun da difend,
se am sbasess ma ste barat
t'la zona an faria piò un cuntrat;
piotost stè da sintoi cus'ell ch'a i'ho da doi,
s'am fae arrivè proima ad vuilt troi
av fazz la baerba a gratis pr'una stmaena.
E da sò Pinaci a doi:
s't'vu ch'at toira la vulaeda
fema al robi da bon fradell
a vlemm e shampoo e i cavell.
Birgo s'la lengua at fura di dint
e doi: an soi propri mai cuntint,
al savoi ch'a so' un purett,
enca s'è shampoo a i'armett.

E da sò Gino ad Nicola:
vlema s-ciantela tot sta fola,
ogneun e farà la cheursa per caunt sù
e vincerà che di forza ne ha di più.
Pinaci e doi; dì, Gino ad Nicola,
per sfrigae s'la saela at sola
al robi al s'è un po' cumplicaedi
al mì muròi al s'è infiambaedi
e s'at fazz avdoi aquè m'e cul
a i'ho di gnocch cumè i fasul;
e s'a vloi ch'av dega tot la verità
a sem quatri ch'a femm pietà,
e tot quant st'al discusiaun,
al merita snò una cunclusiaun,
l'è aura ch'andasema tot in pensiaun.
Giani di Ross, tip alquant esuberaent
ui fa: nu fa mega l'ignuraent,
me s'al mi gambi a pos fae incaura e diletaent
Birgo, che l'eva e fiè in zima i dint
e guaerda vers Pinaci, e doi: t'an sint,
cumè gambi li'i fa una bela ransoida
me l'è la testa ch'la i'è svoita;
comunque l'aqua la vuntarà zò per i foss
proima ch'a cora incaura se Pinaci e sa Giani di Ross.

Aquè e finess tot la storia
di quatri campieun che i vloiva la vittoria,
mo che invici i'ha fat roid
e prit, e caplen e tot San Void